.
انسحاب الدكتورة هبة فؤاد أيوب من سباق انتخابات مجلس النواب 2025 مش
مجرد قرار شخصي لكنه مشهد راقٍ في زمن عز فيه الرقي.
من أول لحظة دخلت فيها الساحة كانت بنت مصر مختلفة مش بتدور على مقعد ولا لقب لكنها داخلة بروح الخدمة وبفكر الواعية اللي شايفة إن السياسة مش ساحة صراع لكنها ميدان للعطاء والانتماء.
قرارها بعدم الترشح رغم شعبيتها الكبيرة ونشاطها اللي لمس رجل الشارع الزقازيقي بيأكد إنها بنت بلد جدعة بتفكر بعقل وقلب في وقت واحد وبتحترم وطنها واحترامها لقرارات الدولة أكبر من أي طموح شخصي.
الزقازيق حزينة النهارده لأن نوارة المرشحين قررت تنسحب لكن الحزن ده مليان فخر لأننا بنتكلم عن ست عرفت إمتى تتقدم وإمتى تتراجع وعرفت إن الكلمة الوطنية أحيانًا أقوى من أي حملة انتخابية.
هي مش غايبة عن المشهد بالعكس لسه حاضرة بوعيها بوجودها وبمحبتها للناس.
وسيبقى اسم هبة فؤاد أيوب شاهد على إن في السياسة ممكن تفضل محترم وممكن تعتذر وأنت رافع راسك وممكن تكسب احترام الناس حتى من غير ما تدخل سباق.
باختصار في زمن الكراسي اختارت الكرامة.
وفي زمن الشعارات اختارت الصدق وفي زمن المصالح اختارت الوطن
حابب اؤكد على ان لزقازيق زعلانة على نوارة المرشحين اللي كانت دايما صوت الناس ووشّ الخير في كل مكان راحت له
الدكتورة هبة“بنت مصر” اللي ما خافتش من الميدان ولا خافت من التجربة لكن لما قررت تنسحب انسحبت برقي واحترام وخلت الكل يقول “أهي دي الست المصرية اللي بتعرف تمشي مرفوعة الراس في أي وقت” ومكابراتش وركبت الموجة
اللي يعرفها عارف إنها ما كانتش بتدور على كرسي كانت بتدور على مكان تخدم منه الناس أكتر وتعمل فرق حقيقي في حياة الغلابة والمحتاجين نشاطها ملموس ووجودها في الشارع الزقازيقي كان طاقة حب وشغل حقيقي مش صور ولا شو إعلامي قرارها زعل كتير من أهل الشرقية بس نفس الناس دي قالت كلمة واحدة:
“اللي زي هبة ما بتغبش عن الخدمات حتى لو انسحبت”
هي انسحبت من السباق بس ما انسحبتش من حبها للناس ولا من دعمها للدولةوقفت وقالتها بصوتها العالي أنا مع بلدي ومع الرئيس السيسي ومع الاستقرار ومع كل خطوة تبني البلد وتخليها أقوى.
الست دي مدرسة في الوعي والاحترام وقدّمت درسا لكل اللي فاكرين السياسة مجرد سباق على الكراسي.
هبة قالتها ببساطةالخدمة مش منصب الخدمة انتماء ومسؤولية وعطاء ما بيقفش.
وده اللي بيخلي الزقازيق كلها النهارده تقول
هبة فؤاد أيوب يمكن انسحبتي من الانتخابات بس كسبتي احترام الكل.
كسبتي قلوب الناس وكسبتي التاريخ.
يقدم موقع منيا القمح تغطية شاملة لكل ما يهم أهالي مدينة منيا القمح ومحافظة الشرقية، من خلال متابعة آخر الأخبار، وما يقدمه نواب المدينة من مبادرات وخدمات، بالإضافة إلى تسليط الضوء على الخدمات العامة والعملية التعليمية، وتغطية قضايا ومناسبات العائلات، وأهم الحوادث الجارية. كما نهتم بإبراز مواهب ملاعبنا ونجوم اللاعبين، ونتناول أخبار عمد ومشايخ البلد، واحتفالات زغروتة، وتكريمات مرتبة الشرف، إلى جانب مجموعة مختارة من المقالات المميزة.
